४ जेठ, डडेलधुरा । मकवानपुर र डडेलधुरामा सोमबार भएका दुर्घटनामा १६ जनाको मृत्यु भएको छ भने ६१ जना घाइते भएका छन् । पूर्व-पश्चिम राजमार्ग अन्त...
४ जेठ, डडेलधुरा । मकवानपुर र डडेलधुरामा सोमबार भएका दुर्घटनामा १६ जनाको मृत्यु भएको छ भने ६१ जना घाइते भएका छन् ।
पूर्व-पश्चिम राजमार्ग अन्तर्गत मकवानपुरको मनहरी ३ रमनटारमा सोमबार अपरान्ह अनियन्त्रित भएर पल्टिएको बसलाई ट्रकले ठक्कर दिंदा ९ को मृत्यु भएको हो । बसमा सवार २५ घाइते छन् । घाइतेको चितवनस्थित विभिन्न अस्पतालमा उपचार भइरहेको छ । तीमध्ये ५ को अवस्था गम्भीर रहेको प्रहरीले जनाएको छ ।
प्रहरीका अनुसार दुर्घटनामा चितवन वीरेन्द्रनगरका ५० वर्षीय योखा गुरुङ, भारत चम्पारणका ३० वर्षीय असलम मियाँ र नवलपरासी देवचुलीका २६ वर्षीय मिसल गुरुङको मृत्यु भएको छ । बाँकीको राति अबेरसम्म सनाखत हुन सकेको छैन ।
घटनास्थलमा ६ र उपचार क्रममा ३ को मृत्यु भएको इप्रका मनहरीका निरीक्षक मोहन अधिकारीले वताए । मृतकमध्ये ४ को शव हेटौंडा अस्पतालमा राखिएको छ । बाँकीको शव भरतपुरस्थित पुरानो र नयाँ मेडिकल कलेजमा राखिएको छ । मृतकमध्ये ४ महिला र ५ पुरुष रहेका छन् ।
वीरगन्जवाट नारायणगढतर्फ जाँदै गरेको ना५ख ३६९६ नम्वरको बस 'ओभरटेक' गर्ने क्रममा पल्टिएको थियो । त्यसलाई नारायणघाटबाट ढुंगा बोकेर हेटौंडा आइरहेको ना४ख ५७६५ नम्बरको ट्रकले ठक्कर दिएको थियो ।
नारायणघाटतर्फ जादै गरेको अगाडीको बसलाई उछिन्ने क्रममा बसको पछाडिको फलामको पट्टा भाँचिएर दाहिनेतर्फ पल्टिंदा ट्रकले ठक्कर दिएको प्रत्यक्षदर्शी हरिशचन्द्र शाहले वताए । मोडमा 'ओभरटेक' गर्न खोज्दा बसको पट्टा भाँचिएको प्रहरीको दावी छ ।
महेन्द्रनगरबाट दार्चुला जाँदै गरेको महाकाली यातायातको ना ५ ख १६८५ नम्बर यात्रुबाहक बस धनगढी-डडेलधुरा राजमार्गमा पर्ने गांखेत गाविस ८ गैरा सडकखण्डको मेलखर्क नजिक सोमवार साँझ दुर्घटना हुँदा ७ जनाको मृत्यु भएको छ । मृत्यु हुनेमा ४ पुरुष र ३ महिला छन् ।
३६ जना घाइते भएका छन् । घाइतेलाई उपचारका लागि कैलालीको अत्तरियास्थित पद्मा अस्पतालमा लगिएको छ ।
बस सडकबाट करिब डेढ सय मिटर तल खसेको छ । अहिले सम्म ७ जनाको मृत्यु भएको खबर प्राप्त भएको डडेल्धुराका प्रहरी प्रमुख डिएसपि योगेन्द्रबहादुर थापाले बताए । दुर्घटनामा मृत्यु भएका मध्ये ४ जनाको मात्र सनाखत भएको घटनास्थल पुगेका प्रहरीले जनाएकोछ । मृत्यु हुनेमा डडेलधुरा जोगबुडाकी राजमती धामी, डडेलधुरा गांखेत गाविस ८ का डम्वर बिक, अपि नगरपालिका ६ दार्चुलाकी परुली धामी र ठेगाना नखुलेका महादेव भट्ट रहेका छन ।
दुर्घटनाको कारण खुल्न सकेको छैन । प्रहरीले प्रारम्भिक अनुसन्धान सुरु गरेको जनाएको छ ।
